Ads 468x60px

Labels

miércoles, 25 de julio de 2012

La fiesta de San Antoniu 2012

Desd’el pueblín cereceru…

Pasámos el cuarenta de Mayu, ya quitamos el sayu y ya quemó la vieya el tayu, o como dicimos en Rusecu, el jendedoriu.

Paecía que la fiesta quedaba allá lantrón, pero ya llegó. Güelvo recordavos que hoy viernes dia 15, quedamos todos pa cenar ena plaza’l Bolugu, que hoy é la fiesta del “Treji”( yo treji esto, treji lo otro…). Cadunu que traya lo que quiera, o lo que pueda, y si venís sin nada tamién val, que después siempre sobra pa tres díes y llegamos al martes con el mismu menú.
La fiesta del treji.


Acordádevos de que é hoy, a ver si vaes a venir el viernes que vien, de la que subís del mercau y resulta que non jalláes más que a David cabruñando la güadaña nueva.

Pues eso, que cenamos allí y después vien unu que é monologuista y llámase Avelino “el Rilu” y que seguru que nos anima la sobremesa. Yo, con esos que jacen monólogos, méxome de risa, asi es que, que valore la comisión, si es que esti hombre jaz munchu de riir, que echen detrás del escenariu una carrocetada de arena, pa no tener que venir a casa al trote lo digo, porque así jacemos como los gatos, escarbas, tapas y ya tá.

Después el DJ pondrá música, non sabemos hasta que hora, pero a los rapaces yos lo digo, que no se queden hasta la hora mecer, porque después a otru día traen unas ojeras que paecen osos panda, qu’entre todos traen unas bolsas debaju los güeyos que da pa jacer el toldo d’un camión. Y van pe la mañana a poner el traje de porruanu y los ven esa xente que vien de ralu en ralu y dicen: -¿Esi é el jiyu de Menganu? ¡vaya desmejorau qu’esta! (No mi jagaes casu, bailade hasta qu’el cuerpu aguante).

El día grande é mañana sábado 16. A ver, pa los que non sepaes venir: tiraes de Posada párriba, toa la recta, en Pandellar daes la curva y tou a derechu hasta que algo vos de enas patas y cayaes de narices al suelu. No vos asustedes, son los carteles indicadores, unu que pon Posada 2km, otru que trae Rales 1, La Robellada 15, (que a mí como soy chica lléganmi a la cintura, pero por ejemplu al mio sobrinu Davo llégani pe las rodillas) pues ahí justu, en esi momentu, giraes a la izquierda y ya non tenés pérdida. Tou p’arriba, curvas, ocalitares, curvas… y llegaes al pueblín cereceru. Preguntaes por el Llusetu y bajaes p’allá, que allí delante casa de Luis y Merce estarán toas las aldeanas a las doce y media como clavos, y los porruanos con el ramu. Subirán hasta la capilla y con San Antoniu saldremos de procesión, que a la una, é la misa.

Después, como siempre, como toa la vida, las muyeres iremos al bar a tomar el vermú mientras jacemos muera hasta qu’esté la comida y jablaremos de cosas super importantes, de cómo va la roja, de cómo quedó Alonso… y cuando cansemos de dar a la llarpiza vamos pa casa, que ya los maridos tendrán la mesa puesta, con el pitu caleya calentín, las patatinas recién fritas, la delantera de casa barrida… en fin, con tou dispuestu. Son unos soles, como el del chiste, que dicía:
-La mio muyer é un sol ena cocina.
-¡ah! ¿Que cocina bien?
-¡No! Que tou lo quema.
Comeremos como siempre se come el día la fiesta, en familia y con amigos, después tomaremos una copina o un chupitín mientras jablamos de cosas super importantes, como de gran hermano, o de qu’estevo la Esteban per Cabrales… y pa cuando nos demos cuenta, ya tienen los hombres la basa fregada, secada y guardada en armariu, que ya se sabe como son de tiquis miquis, y lo munchu que yos gusta tener la cocina arrecaldada por si vien algunu. Y mientras pelan unas patatas pa la noche, nos dicen a nos, a las muyeres: - ¡Hala, échate un ratín ena cama que si no a la noche estás muy cansada!

Y nos, obedientes, bien mandadas, echamos un pigazu perellí per cualquier láu, en el sofá mismu, o como dicen los q’estuvieren per la Belxick, en el flotoi.

Pa cuando despertemos ya están los paisanos poniendo la mesa pa cenar. Esperamos a los invitaos, jacemos un pocu de tiempu, tomamos una sidrina, hasta que el maridu nos llame pa cenar. Nos sentamos y ahí vienen ellos con la cena, jaciéndonos creer qu’estuvieren toa la tardi cocinando, y nos disimulamos delante de las visitas, porque ya vemos que é lo del mediudía calentau, el pitu caleya de las doce, lo que pasa que fríen unas patatas y ponen un pocu lechuga, y ¡Hala!

Pero buenu, está bien aprovéchalo tou, que no están los tiempos pa tirar y pa qu’estén contentos yos dicimos: - Cari, está güenísimu, cada día cocinas mejor.

Y ellos, con esi pocu, llénanse d’orgullu y piensan en lo que van a poner pa comer mañana. Son soles, vo lo digo yo ¡son soles!

Mientras acaban ellos de fregar y recoger, nos entretenemos a las visitas escuchanoyos la conversación que tienen super profunda y cuando ya non podemos más dicimosi al maridu: - Cari ¿acabas ya? É que ya suena l’orquesta.

Y ellos los probes, están intentando poner los zapatos que compraren expresamente pa hoy, y que a cuenta d’estar tul día de pie, traen las nueces de los pies hinchaos como botos y al final tienen que dir a la fiesta en chanclas, d’esas que asoman las didas. Pero contentos ¿eh? ¡Satisfechos del trabayu bien jechu!

Mientras tocan el dúo Cigarra y el trío Tobogán tomaremos algo. Acordádevos de sacar al maridu a bailar un pasodoble o dos, porque si no a otru día traen un focicu que se yos amarra y non sabemos por qué, y é porque non yos jaciemos casu. Hay que dayos un pocu de atención, que pa eso llevan toa la semana pelando pollos, pintando la fachada, pintando los jierros de las ventanas, quitando telarañas, poniendo la ropa a postoriu… en fin, que me lio.

A la una de la mañana, é el baile de l’escoba, que yo creía que tenían que barrer los paisanos la plaza, pero no, resulta que hay que bailar con la escoba ena mano y cuando pare l’orquesta de tocar…¡Zas! Escobazu en llombu a la pareja que tengaes más cerca. Lo que no entendí bien joi lo de los premios, no sé si gana el que más escobazos dé, o el que más escobazos lleve. Ya vo lo explicarán allí.

Y cuando acabe la fiesta ya nos habrán preparau los maridos el chocolatín caliente, pa entonar el cuerpu antes de dise pa la cama. 

Acordádevos de que hay carpa, asi es que igual da que llueva que no, y la semana que vien ya vos cunto como nos joi la cosa.

Cambiando de tema ¿Ya llamastes a Laura, la corresponsal de Quintana? Pues ya la estaes llamando, pa lo de la comida del oriente, que hay que saber cuantos somos pa reservar.

Y na más, si querés ver más cosas podés entrar ena página del faccebok de “Quelylladas”, o dejami lo que queraes en el correu quelyrusecu@hotmail.com 

¡Salud!

0 comentarios:

Publicar un comentario