La Navidá é un cuentu....

-¡Camareru! Dami una sidra de lo peor que tengas, de lo más perroneru, de lo que mañana mi de un dolor de cabeza que no haya bastantes aspirinas ena Bayer pa mí.

-Pero Manolo… va ser la primera vez que te vea tomando sidra mala… ¿Pásati algo?

-¡Si! Mi pasa de tóu ¿Sabes que día é hoy?

-Jueves.

-¡Si, jueves! Veinte de diciembre, mañana acábase’l mundiu ¿Sabíaslo? Pues por eso, quiero emborrachame hoy, asina mañana pa cuando quiera dami la resaca… ¡Zas! Desapaece’l mundiu.

-Manolo ¿Y si no s’acaba? ¿Si resulta que los Mayas esos s’equivocaren?

-Pues nada…pasaré la resaca, metereme tul día ena cama, mandaré-y a la parienta que mi ponga un calderu d’esos de zin al láu pa dir esgomitando allá la sidre que tú mi des hoy, que ya estará cortáu, coaguláu… y peor qu’eso… sufriré en silenciu la idea de que acuenta de que no s’acabó’l mundiu, tendré que pasar la navidá en familia. Tocarami dir a cenar a casa mio suegra… ¡que la odio!

-¿Odias a to suegra?

-¡No home no! Odio la navidá, a mio suegra é que no la puedo ni ver delante, pero tantu como odiala…no. Eso sería tener un sentimientu fuerte por ella y yo por ella… no siento nada, odiala sería prestá-y mucha atención.

-No te conozo Manolo… hoy no eres tú.

-Tú vete echando sidra y según vaya acabándolo echas más, hasta qu’esté como un arbeyu y cuando me veas muy mal llamas al 112, creo que va ser lo mejor, porque si no s’acaba’l mundiu… voy a estar mejor pasando la navidá en urgencias qu’en casa. Porque mira… cuando salí de casa oi cantar villancicos ena plaza y ya me pusi d’una mala ostia…que se mi regolvieren las tripas y tóu… ¡Y no me mires así! ¿Eh? Que como yo hay munchos.

-Ya, ya lo sé, si yo conozo a más gente que odia la navidá, que gente que-y preste. Todos llegan dijiendo… ¡Cuando será ocho d’enero! Pero son cuatro díes hombre, pasan d’un soplidu.

-¿Cuatro díes? Cuatro díes serán en to casa, ena mía…¡Mecagon San Apapucio, duran tres meses!

-Ya será menos hombre.

-¿Menos? En octubre ya vieno mio suegra a traenos una pila turrón, que si duru, que si blandu, que si de yema… y dígo-y, que a onde va con tantu y dizmi que é qu’estaba d’oferta… ¿d’oferta? d’oferta va tener que poner usté las faldas en mercadillo, que ya no-y abrocha ni una, que paez una gocha en noviembre ¡A puntu de jacé-y el San Martín! Y claru, ahí empezó el primer lío de las navidades, porque ya empezó la mio muyer a dicir que si odio a la madre, que siempre estoy llamándo-y gorda, que si esto, que si lo otro… y ya-y digo yo, que no la odio, que solu é que no la puedo ver delante ¡me saca de quiciu! Ya lleva dos meses preguntando que queremos pa cenar enas navidades, que si tien que dir a comprar los langostinos, que depués están mu caros… ¡que ascu! Lleva desde octubre col mismu cantar, no piensa más qu’en comer, que ya no cabe pe las puertas, que cuesta más trabayu rodeala que saltala, qu’está tul día a dos carrillos moviendo el bigote, que si una peladilla, que si un bombón… y después, el otru día qu’estaba ella ena mio cocina, que no sé por qué cojones tien qu’estar tul día allí, que paez que no tien casa… y viome a mí garrar un cachu de turrón de lo blandu y enseguida saltó… ¡Manolo, non comas eso que depués ti sube’l azucar! … ¡Mecagüen las entretelas de las tripas del gochu que matamos el añu pasáu! ¿Qué mi sube’l azúcar? ¿Y a ti no? Que debes de tener las almorranas garrapiñadas ¡Tragona!... y ya-y lo diji a la parienta, qu’el últimu añu que se celebra la navidá, que non val más que pa líos y riñas, que ellas non saben ni lo que celebran, no lo jacen más que por comer, no yos da más que sea porque haya nacidu el niño Jesús ni nada, lo hacen na más que por comer, que no comen el nacimiento porqu’está duru, que si no…¿ond’estaba ya? Y diz la mio muyer que hay que adornar la casa y celebralo aunque no sea na más que por los crios ¿Qué crios? Si el guaje míu chicu ya jezo trenta años y el grande ya tien trenta y dos o trenta y tres… y no vienen a venos nunca y cuando vienen se van con el últimu bocáu ena boca, que siempre tienen prisa… yo pa mí que é por non ver a la güela, a mio suegra, que é más pesada que un kilo mierda… yo pa mí, que los Mayas esos tendrían una suegra tan cabrona como la mía y ponieren que s’acababa el mundiu el día veintiuno pa no tener que dir a cenar el día nochebuena con ella ¿Qué, que no?

-Joder Manolo que bestia eres. Con lo guapa que é la navidá, con sus adornos…

-¡Ah! Jablando d’adornos… ¿Non visti qu’estos díes andevi un pocu coxu? Pues joi a cuenta del árbol de navidá. Resulta qu’el nuestru salón é mu chicu, pero a esta muyer mía se-y antoxa siempre poner el árbol y el nacimiento, y claru ¿Qué pasa? Qu’estoy hasta el últimu pelu de la cabeza del lío de cables que tien pel suelu pa poner esas luces de mierrrrrda que s’apagan y s’encienden, y encima tienen música, que paez una máquina tragaperras y el otru día levanteme pe la noche al bañu y enredósemi el alargador entre las patas y dí una mayada contra el nacimiento… que salió volando el muñecu esi qu’está jaciendo de cuerpu ¿Cómo se llama?

-El caganet.

-Esi, pues salió disparáu y estrellose contra la ventana y jézose polvu el cristal, qu’el cachu más grande era como esta uña mía y caí al suelu encima de los cristales y estevi allí tiráu n’aquellas baldosas frías, que con las ganas que yo tenía de mexar y el fríu que tenía… allí mismu me meé, que pensé que me iban a jallar muertu pe la mañana porque estaba tóu llenu cables mezcláu con la meada… y pensaba…¡como heba un cable peláu, non llego a la fecha que dijieren los Mayas! Di voces hasta que quedé roncu ¿Creés que me oyó la parienta? ¡ni casu! Oía yo los ronquidos desd’el pisu d’abaju. Así es que, cuando me podí levantar, que serían po lo menos las cinco la mañana, garré el árbol y ¡zas! Pe la ventana allá juera, con tóu y cables, alargador, regleta… y tóu me abrasé pe los pies con los cristales, pero… ¡descansé!

- Que burru eres Manolo.

- Y ella, mira si é pocu fata, que pe la mañana pa cuando yo me levanté ya había llamáu a la guardia civil pa diciyos que nos habían robáu el árbol de navidá, el paisano que jaz de cuerpu, el alargador y que nos habían meáu en salón. Yo… mutis, no diji ni palabra, estaba contentu de haber quitáu aquel troye de casa. De nada mi valió, porque aquel día ya fue a comprar otru y depués, encima, es que nunca jalla el momentu pa quitalu, siempre llegamos al vente d’enero con el salón entrolláu. Pero ¡ojo, non dejes tú las zapatillas juera del sitiu porque entós ya tienes bastante que oir! Y ahora llevamos tul mes de diciembre discutiendo sobre onde cenamos el día nochebuena, que si en casa so madre, que si en casa de la mía…

-¿Y tú onde la quieres pasar?

-¡Hombre, la duda ofende! La noche vieja con los suegros, por si mio suegra s’atraganta con las uvas estar presente, no podría soportar que mi lo cuntaran ¡quiero velo! Y eso que me jode tener que cenar con ella, porque pon un pavu al jornu… secu… que paez qu’estás comiendo una estiella d’ocálitu. Pero diz ella que leyó en una revista qu’el pavu adelgaza ¿Qué adelgaza? Lo que adelgaza é miralo, y no como ella que echa un platáu y tovía repite ¡Aggggg, que ascu-y tengo!

-¿Al pavu?

-¡No home no! A mio suegra ¡Quiero que sea ocho d’enero ya! Que ya sea depués de Reyes, que esa é otra… los de los regalos… ¡me supera! To los años el mismu cuentu, llega el día cinco pe la noche y ya empieza la mio muyer a lloromingar, que seguru que no-y compré nada, que soy un gochu desagradecidu… y yo siempre-y digo… pero jiya ¿no ti trayo to los meses el sobre con el sueldu? ¡pues compra lo que tú quieras, que así ajorramos de dir a descambialo!

-¿Y ella que diz?

-¡Puf, el añu pasáu echaba bulleru pe la boca! Pero es que ¿tú sabes que mi regala ella a mi?

-No.

-Vo dicítilo yo… to los años mi pon allí un engüeltu con dos pares de calcetos y un pañuelu de sonar los mocos… qu’el engüeltu ¿eh? Veslu en esi momentu y no lu ves nunca más, lu desapaece, que más que casáu con ella paez qu’estó casáu con Juan Tamariz. Que oye… entre tú y yo… ¿no se ti paez Juan Tamariz a mio suegra?

-Ahora que lo dices… un pocu si.

-A lo que ti iba, qu’el regalu míu desapaece ¿y sabes cuando lu güelvo a ver?

-Ni idea.

-¡El día del padre! El día del padre vienen los guajes a comer y a los postres apaez el engüeltu con los putos calcetos y el pañuelu de mierda. Yo creo que llevan trenta y cinco años dándomi el mismu regalu ¡que! ¿Qué no? Pero no t’apures, que pa so madre compra de lo güenu lo mejor, pero pa la mía… unas zapatillas podres, que no te lo pierdas, espera siempre a compralas enas rebajas, que mio madre cuando recibe’l regalu de Reyes… é casi marzo. Esta con los años va golviéndose de mala como la madre, pero ya-y lo diji, que si se güelve así… ¡me separo! ¡com’hay Dios que me separo!... oye… ¿Cuántos culinos llevo?

-Once Manolo, once.

-Pues tovía estoy cuerdu, tendré que tomar otros tantos. Ahora entiendo a mio suegru, vase tul día pal chigre a tomar copas de guindas y a cantar tonada y no m’extraña, é pa no aguantar a la muyer. A esi tendrían que poné-y un monumentu ena plaza, menos mal que ya-y queda pocu.

-¡No jodas! ¿Tien alguna enfermedá incurable?

-¡No home no! Lo digo porque mañana s’acaba’l mundiu.

-¡Ah!

-Esos Mayas eran listos de cojones, apuesto la cabeza y no la pierdo a qu’el Maya que talló la piedra tenía una suegra tan insufrible como la mía y dijo… ¡Voy a salvar a todos los hombres, haré que s’acabe la vida justu antes de que tengan que cenar con la suegra el día de noche buena!

-¡Anda Manolo, que eres un cansinu!

-Échami otru culín y calla. Y ya sabes, cuando pierda el sentidu llamas al 112, que prefiero estar en urgencias que con esa bruja… y pon una ronda pa todos, que quiero brindar por los Mayas.

-¿Pa que acierten y s’acabe’l mundiu?

-¡No home no! Pa que s’equivoquen, que no sé que coño tien esta sidra… ¡snfff! Que mi dan unas ganas de llorar… ¡snfff! Y no sé que mi pasa, pero ¿sabes?... ¡snfff! Creo que quiero un pocu a mio suegra ¡snfff! … buenu, no… no la quiero un pocu ¡la quiero muchu! Pero muchu muchu ¿eh? Y quiero cenar con ella ¡snfff!... y … ¡snfff! No está gorda… lo que pasa é que é de güesu anchu la probe… ¡snfff! Y cocina muy bien, lo que pasa é que el pavu-y queda secu porque yo siempre llego tardi y mi lo deja en jornu pa que no mi enfríe…¡snfff! Y se-y seca la probuca….¡snfff! y… echa otra ronda… y cóbrami… y lo que sobre pal guaje… ¡que te quiero tío!...¡snfff! y…

¡¡¡Que feliz navidá!!!